كتبت قصيدتي هذه استجابة لمشاعر زوجة احد اصدقائي الذين طالتهم يد الغدر وهو اب لولدين هما عمر ويوسف فكتبت القصيدة بلسان حالها هدية لكل الاعضاء الكرام ارجوا ان تنال رضاكم وأترك لكم التعليق لمواساة هذه العراقيه وكل العراقيات ........
(( رثاء مفجوع))
صفت روحي حزينه وعاشكة النوح
وانا جفني بغيابك عاشك الدمعه
وأذا اصبر الجفن شيصبر الروح
وطفل روحي بغيابك مابلغ سبعه
ياروحي بغيابك كلبي مجروح
وجنت انت بظلامي تصير الي شمعه
وأنا عكبك شبيه الطير مذبوح
وطحت عكبك حبيبي بمية ألف وجعه
تعبني الالم والصوت مبحوح
وخاويت الحزن بس انحب وأنعى
وجفني ماغمض كل وكته مفتوح
هجرني النوم راح وبعد شيرجعه
أصبر الروح كوه وجفني مفضوح
وكلبي على البعد صار الحزن طبعه
أنكتل بي الفرح بعدك والامال
وجفني ما نشف دمعه ولامال
عكبك لاولد ينفع ولا مال
وأحس نور الشمس ظلمة عليه
وأشييم بالصبر أذتني الجروح
وأفزع كبريائي المات بي فزعه
كمت أضحج جذب والجذب مفضوح
وترد تهمل دمعتي وتنزل بسرعه
أبحر حزنك حبيبي الكلب سابوح
ويصرخ يافراس ومحد يسمعه
ويضل صوت الصدى بأذني وأبد ميروح
ويفز مجبور كلبي على الصدى يتبعه
أحضرني على بختك ياسفينة نوح
طوفان الحزن مايرحم بطبعه
تعال الكلب جن وجنن الروح
وطبيبي انت الوحيد وممكن تقنعه
تعال وخل أشوفك بلكي ارتاح
ويهدأ كل جنوني وأسكت بسرعه
تعال وجتف أجدامي وأديني
أطيعك أحلف بالله وديني
اريد ارتاح من حملي وديني
وأوفي وياك كل دين العليه
تعال وشوف دارك ملت النوح
تبجي بدم عليك وما بجت دمعه
تنطر جيتك والباب مفتوح
ومشيت انت حبيبي بغير متودعه
وناذر لو تجي بس لحظة وتروح
تحت جدمك يصلي البيت الف ركعه
تعال أمك وابوك بطرك بس روح
وأخييك عكب شخصك منتكس وضعه
وعمر شاب بسبب فكدك ويوسف
وعكبك يا خبر يحزن ويؤسف
وحك المصطفى وعيسى ويوسف
العهد وياك باقي للمنيه
أحب غيرك أبد ياروحي مامسموح
قرار من الكلب مابي ابد رجعه
لان حبك ملكني وعشعش بهلروح
والحب ياحبيبي احساس موسلعه
عفت روحي على كبرك جسد مطروح
لان كلبي حديقه وبس الك زرعه
موضوع: قصيدة رثاء زوجه مفجوعه بمقتل زوجها على يد فرق الموت الطائفية ارجوا مشاركتها حزنها 
الأحد 21 سبتمبر 2008, 4:00 am
