كم مره يزعل مني واراضي
ويدلّل على قليبي واراضي
مابقت عندي املاك واراضي
بعت حتى هدومي ال عـليـّه
مامن عارفه ياناس ينسال
دمع العين كبل البجي ينسال
شفنه البي مرض يناس ينسال
وانا مسلول مامن مرض بيه
احبابي شلون حالتكم بعدنا
شبدينا والوكت عنكم بعدنا
اذا انتم نسيتونا بعدنا
بذجركم كل صباح وكل مسية
القلب مارف على غيرك ولامال
خلص عمري من كثر وعودك والامال
ابد لاولف عندي يأنسني ولا مال
الونس انته حبيبي وهاي هيه
أحبك من صغر عودي وسني
ومن حبك وكع شعري وسني
على حالي بجى شيعي وسني
وثالثهم مسيحي يون علية
حلوه وبلحچي ياناس عطره
وماعون الصديق النذل عطره
المعمم صار ريحت كاز عطره
اريد اجدح واخاف يكب عليه
يا من بالقلب والروح حليت
زرعت مر الصبر وهواي حليت
جم مشكلة جبيرة يا ولفي حليت
وهواك المسألة الصعبت علية
انا المامش اسم عندي ولا دور
واريد اوكف انا الوكتي ولا دور
بعد لا دار ينفع عندي ولا دور
اعلمة وبنكلب عكرب علية
احب جفنك واحب عينك ورمشاك
واظل طول العمر امشي ورة مشاك
اذا تكطع مراسيلك ورمشاك
وينك يا حلو بس رد علية
اكتب شما ردت تكتب و ردلك
أزعل وابتعد عنك و ردلك
بساتين بوسط قلبي ووردلك
وشما تبعد تظل غالي علية
مفارك واليالي سنين مرن
وعلي صاير لذيذ الزاد مُرن
طفر قلبي ع النقال من رن
حسبت العزيز يدق علية
اطلع من جفن عينك وارد بيك
واشتم عطر من خدك ورد بيك
صرت مثل لقصيده انت ورد بيك
وصرت انت النبض والروح بيه
اشحلو طولك من تمشي وانا راك
عفا قلبي الحمل ناري وناراك
اذا انت تعب حيلك انا راك
عليل اشفى اذا مريت بية
منو مثلي صبر للضيم ..... ماهم
وجثير أحباب وأصبحوا ..... ماهم
وشما يثكل عليه الحمل ..... ماأهم
بس أهم بفراكم اليصعب عليه
أيا عمر إنقضى وما شفت راحات
أعظ بشفاي حيل فركت راحات
ليالي الما ردتهة تروح راحــت
واجتني الما ردتهة تمر علية
اشعجب دفتر عشكَنة ما تكَلبة
وليش اليكَلبك ما تكَلبة
ترى كَلبي بغيابك مات كَلبة
وكَلب كَلبي توفى وعم علية
أفرح لو شفت وجهك وسر بي
وحبك بالكَلب ثابت وسربي
شما طال الدرب امشي واسر بي
واجيب الروح لعيونك هدية
زوج طيور حبنا وصفن بس تك
وصرنا بحلوك الشماتة علج بستك
ولك مدري شجاني وكَمت بستك
واحس نار روحي تشتعل بية
لساني كَبال حلو الطول لك لك
واحذرك لا تكَولي النوب لك لك
الغيرك ما يصير الكَلب لك لك
لا ن انت شريك وياي بية
يا صاحب هاك اخذ مكتوب وصله
واريد اعرف عمامه منين و اصله
كلبي عليك صار 12 وصله
كل وصله تصيح جيبو اليه
حجي العذال عذبني وذاني
وباب الكلب سديته وذاني
احبك يا بعد روحي واذا اني
هجرتك كول بالحب مو وفيه
كَلبي انت ملكته وانت حر بي
عليل وطبي عندك وانت حر بي
يا كاس الاشربه وانتحر بي
شربت حبك هو العم عليه
موضوع: ابوذيات 
الجمعة 26 سبتمبر 2008, 4:09 pm
